KE GONA GE RE PHELA

Ge e le go kgotsa re lapile, go šetše go idibala fela. Ka mahlo re di bone go lekane, a nke O re khutšiše hle. Re be re kholophane e le ruri, empa gona bjalo kgomo ya moradu ge e re lebelela e a itumela ya ba ya tshegela ka lehwafeng. Mahlo a gohlometše, dinko di re etile pele ge re sepela, meriri e lekana go hlobja re sa tšwa go e beula maloba. Ge e le ditsebe tšona di thibela le moya wo o iphokaletšago go gotoka ka lethabo. O reng o re lesa re otišwa ke go timela ga bana ba lefase le? Ge e le gore bare ba tshwere ye e edilego, gona re eletše O re botše gore re kgone go ba eletša le go ba botšiša gore key a bafe bagologolo yeo ba sepelago ka yona.

Ke bona ba re kwatamelago letšatši le lengwe le le lengwe ba re botša ka Pukukgolo ya gago Thobela, efela ga ke bone gore ke yona ye ba mpoditšego yona melao ye ba e šikerego. Gona a ba re tlogele gobane sa rena diputswa le dipududu e be e le go di sohla gore re tle re kgone go ja mangangahlaa re iketlile kgorong ya mošate. Ge re re re ba eletša ka wona molao wo re boditšwego ke bona, ba re phakganyetša matsogo ba re furalela ba feleletša ka la gore re botše ba rena bana. Ge ba ka bana ke ba boditše tsebe go kwa gomme ba latela se ke ba boditšego sona, se ke ba kikitetšego ka ditsebeng, go pala kae gore le wena ke go laye o tsene tseleng ya go loka ka ge le wena ke go sema waka ngwana? Ngwana molao o topa tseleng beng ba ka gobane ke mang yo o ka rego o mo laela ngwana a go sema molahletši? Nkeletšeng ke tsebe nnete gobane ga ke nyake go wela dikomeng tša batho.

Bjaka bja go lekana le bja tšhoši bjoko bo nkeleditše gore seo ke bonago ba se dira matšatšing a bo lehono ke diphšiša-mare tšeo di kgelogilego ditaelong tša gago Ramasedi-a-poloko. A e šita le sa gešu segologolo se be se sa gopole gore tša mohuta wo, tše re di phafogetšego ka lona lebaka le, di ka dirwa go le lefase ra di bogela. Ge o ka ba lesa ba tšwela pele le yona mediro ye ntle le go ba fa kotlo, le nna ke a go kgopela hle Ramaatlaohle, mpoetše bjaneng ke tle ke iphsine ka go go senyetša ka gore le nna nka se lese go ba ekiša. Se ke sa se tsebego ke gore naa ka kgonthe ba a iphsina goba ba no di dira di ba babela. Ke tla ba ka tseba ka gore le nna ke tla ba ke ba šetše morago . Dimpja bošego di a bofiwa ka gore ge re ka di bofolla re tla itshola ge bo esa. Go thušang go di bofa ka gore le ge re di lesa di itshepelela, ge re ka ragela maswiswi ntlong re lapa go kgotsa ka baka la go hwetša di bofilwe? Ga go hole selo go di lesa di šoma wa tšona mošomo wa go hlokomela motse bošego ka gore ke ga kae ke bona mokgalabje a gwagwaiša enngwe ya tša gagwe go yo e lahlela moeding wa kgole le motse gore e bolele gona? Go lokile go lekane, seledu se tla ba sa kgoboga.

Mang le mang a ka ntlhatsela ge ke re ntle le yo le mo hlwetšego kgole le gae, re be re tseba ge bošego e le bja baloi le dikgotlabatho, diphoofolo le maribiši. Go leša dihlong ga kaakang ge moagišane wa ka a mpotša gore e šetše e le mašego a mabedi a tsošwa go bjo monate bja ditoro tše bose le dimpja di sa ile bogweng ge lebati la ngwako wa gagwe le lwešwa go bulwa. Wa ngangarišana le lebati o le mang le go kokota o sa kokote? Ge a bula a butšiša gore e ka ba ke mang wa go sikintšha lebati, le gona o nyakang bošego bjo bo kaalo, mošimane a mmontšha ka fase ga maoto ditsepu tša tsena fase ya ba ge a ile. La bobedi ge a etšwa ke ge bjalo go katanwa le la bana. A sa re o nyaka go botšiša gore naa motho o thušwa ka eng ke ge a thulwa ka hlogo a kanama kua kgole bobete bjare tšhaba ke fete! Ge re rapalatšwa ke barwa le barwedi ba rena re ilale re tla feleletša re tšere eng ra bea? Ge re lala re tsošwa mašego re ilale, re tla bo pata neng bja ditoro tše monate? Ge re duletše go šišinya dihlogo re sa fetše kua kgorong, mafate a go fahlela mo diruiwa tša rena di šwahlago gona tša re feletša mabele re tla a rema neng bana ba kgoši ya gešu? Wa go tshwana le nna ke le bjalo ka sešegong sa ka go rarakane lepobe, ge di bunne tšhemo ya e mongwe ke tla lefa ka tate a ile molete-mohlaela-thupa? Ke a ba bona ke bona ba re bakelago dinyakabela mo lešakong la gešu.